രാവിനൊപ്പമൊരു പാലായനം(Palakkad,Kerala)

യാത്രയുടെ തുടക്കം......
വാഹനം നീങ്ങി തുടങ്ങി. ഇടക്കിടെ ചെറിയ യാത്രാ ഇടവേളകൾ. ഇരുട്ട്‌ പ്രതികാരമെന്നപോലെ തളം കെട്ടിയ രാവിൽ ഫ്ലൂറസെന്റ്‌ ലാമ്പുകളുടെ വെളിച്ചം പരവതാനി വിരിച്ച സുന്തരമായ കോയമ്പത്തൂർ റോഡ്‌ അതിസുന്തരിയായി കാണപ്പെട്ടു. അങ്ങിങ്ങായി ചില ചെറിയ തട്ടുകടകൾ ഒഴിച്ചാൽ വാക്കിയൊക്കെയും നിശബ്ദത.
റോഡിൽ കടന്ന് പോകുന്ന വാഹനങ്ങളുടെ ഇടക്കിടെയുള്ള മൂളലുകളും, ഇരമ്പലുകളും കൂട്ടിനു ചെറിയ ശബ്ദത്തിൽ പാട്ടുമിട്ട്‌ പതിയെ നീങ്ങുന്ന ഞങ്ങളും.
കൂട്ടത്തിലുള്ളവരിൽ ഒരാളൊഴിച്ച്‌ വാക്കി പങ്കാളികളെല്ലാം  സുഖനിദ്രയിൽ ആണ്ടുപൂണ്ടുറങ്ങുന്നു.    ഇടക്കെന്തോ തിരയാനെന്നപോലെ എണീറ്റ്‌ നോക്കുന്ന ഒരുവനും , ഡ്രൈവിംഗ്‌ സീറ്റിനരികിലെ ഗ്ലാസ്‌ താക്കാൻ പറ്റാത്തതിനാൽ തലയും കയ്യും വെളിയിലിട്ട്‌ അലറാൻ പറ്റത്തതിന്റെ വിഷമം ഉള്ളിൽ കടിചൊതുക്കി .

രണ്ടര മണിയോടടുത്തപ്പോൾ ഗൂഗിളിലെ പെൺകുട്ടി ഇടക്കിടെയായിട്ട്‌ ഞങ്ങൾ പാലക്കാട്‌ റോഡ്‌ കഴിഞ്ഞ്‌ നേരെ പോവുകയാണെന്ന് അലമുറയിട്ട്‌ പറയുന്നത്‌ കേട്ടു.
ഒറ്റ യൂ-ടേണിൽ തിരികെ വഴിതേടി ഒരു യാത്ര.
ഓവർ ബ്രിഡ്ജിറങ്ങി വലത്തേക്ക്‌ തിരിഞ്ഞ്‌ നേരെ പാലക്കാടിന്റെ മണ്ണിലേക്ക്‌.
പാലക്കാട്‌ ടൗണിലേക്കുള്ള വഴി ആവശ്യപ്പെട്ട ഞങ്ങളെ ഗൂഗിളിലെ കുട്ടി 600 മീറ്റർ വീതം ഒരേ സ്ഥലത്തിട്ട്‌ മൂന്നു തവണ കറക്കിയപ്പോൾ പാലക്കാട്‌ ടൗൺ ഏകദേശമെല്ലാം ഞങ്ങളെ ചുറ്റി കാണിക്കാൻ കൊണ്ടുപോയതാണെന്ന് 
സമാധാനിച്ചു.
നഗരം ഉണരാൻ ഇനി ഇനി അൽപ സമയം ബാക്കി. അതിനു മുമ്പ്‌ പ്രാർത്ഥന എന്ന ലക്ഷ്യത്തോടെ പള്ളിയന്വേഷിച്ച്‌ വഴിയരികിൽ വാഹനമൊതുക്കി പാലക്കാടിന്റെ മണ്ണിലേക്ക്‌ ആദ്യ കാൽപാദങ്ങൾ എടുത്തു നാട്ടി .
പാലക്കാടിന്റെ സത്വസിദ്ധമായ ആ കാറ്റിന്റെ കുളിരേറ്റുകൊണ്ട്‌ ...

ഒരു യാത്രയുടെ മുന്നൊരുക്കങ്ങൾ

രാവിന്റെ അവസാന യാമം ആയിട്ടില്ല, മൂന്നാളുകൾ പള്ളിയുടെ പുറത്ത്‌ ഗാഡമായ ആലോചനയിലാണ്ടിരിക്കേ നാലാമൻ അവിടേക്ക്‌ കടന്നു ചെന്നു.
ആഗ്രഹം യാത്രയാണു, ലക്ഷ്യം അറിവും അനുഭവവുമാണു, തടസം പണമാണു, ആകെയുള്ളത്‌ സൃഷ്ടാവിനോടുള്ള ഭയവും സൃഷ്ടികളോടുള്ള ധൈര്യവുമാണു. അത്‌ മതിയല്ലോ ആശിച്ചത്‌ നേടാൻ.
അഞ്ചാളുകൾ ചേർന്നാൽ മൂന്നു ദിവസം നീളുന്ന ഏഴുകളറിൽ വിരിഞ്ഞ മഴവില്ലുപോലെ സുന്ദരമായ ദിനങ്ങളും അനുഭവങ്ങളും.

സ്വപ്നങ്ങൾ ഉയരങ്ങളിൽ നിന്നും വേണം തുടങ്ങാൻ എന്നതൊരു സ്വപ്നമായിരുന്നു. അതുകൊണ്ട്‌ രണ്ടാമതൊന്ന് അലോചിച്ചില്ല ആദ്യം തന്നെ ഉയരത്തിൽ നിന്നു തുടങ്ങി. തീരുമാനം കച്ചറ കമ്മിറ്റിയിൽ കൂടിയാലോചനക്ക്‌ വെച്ച സംഘം അഞ്ചാമനൊരുവൻ പിഞ്ചായി നഞ്ച്‌ കലരാത്ത നൻപൻ ആവണമെന്ന് ആശയുള്ളപ്പോൾ അങ്ങനൊരുവനേയും കൂട്ടിരുത്തി.

അങ്ങനെ തീരുമാനം പാലക്കാട്‌ ജില്ലയിലെ നെല്ലിയാമ്പതി എന്ന ഉയരം കൂടിയ സുന്ദരമായ നാട്ടിലേക്ക്‌ എത്തിനിന്നു.
അന്വേഷണം ഒപ്പം ആവേശം ഒപ്പത്തിനൊപ്പം മൽസരം വെചപ്പോൾ അത്‌ കുറച്ചൊന്ന് വികസിപ്പിച്ച്‌ ജില്ലയിൽ പരമാവധി കാണാൻ കഴിയുന്നതെല്ലാം യാത്രക്കുള്ളതാണെന്ന് ഉറപ്പിച്ചു.
അങ്ങനെ "വരുത്തപ്പെടാത വാലിബർ സംഘം" ദിനരാത്രങ്ങൾ എണ്ണി കഴിഞ്ഞുകൂടി..ഒപ്പം സ്വപ്നങ്ങളുടെ കുടുക്കയിൽ സ്വപ്ന സാഫല്യത്തിന്റെ നാണയങ്ങൾ പെറുക്കിയിട്ടുക്കൊണ്ടേയിരുന്നു.
പോകാനുള്ള വണ്ടിയും ഒപ്പിച്ചെടുത്ത്‌ വരുമ്പോളാണു രഥത്തിനു പേപ്പറൊന്നുമില്ലാന്നുള്ള സത്യം വെളിപ്പെട്ടത്‌ .അതിന്റെ പിറകേ നടന്നതും ശരിയാക്കി യാത്രക്കൊരുങ്ങി.
യാത്രയുടെ ദൈർഖ്യവും ദൂരവും സൗകര്യങ്ങളും സാമഗ്രികളും സന്തുലിതാവസ്തയും അളന്ന് കുറിച്ച്‌ സാമ്പത്തിക ബജറ്റ്‌ പാസാക്കി. സംഭാവനകൾ വർദ്ധിച്ചപ്പോൾ സ്വപ്നങ്ങൾക്ക്‌ സൗകര്യമേറി. ഇതിനൊക്കെയുമിടയിൽ സ്വപ്നസാക്ഷാത്കാരങ്ങൾ കാലത്തിന്റെ കുതറിയോട്ടത്തിൽ ആരും കാണാതെ പോകരുതെന്നുള്ള ആഗ്രഹം കൊണ്ട്‌ ഒക്കെയുമൊപ്പിയെടുക്കാൻ ക്യാമറയും ഒരുക്കി ആ ദിനത്തിനായി കാത്തിരുന്നു.

  . . . . . .